Wararka24: Israel ayaa sii ballaarinaysa xiriirrada ay la leedahay maamullo iyo gobollo leh muranno siyaasadeed oo ku saabsan madaxbannaanidooda, xilli ay wajahaysa dhaleeceyn caalami ah oo ka dhalatay dagaallada Gaza, Lubnaan iyo xiisadaha gobolka Bariga Dhexe.
Warbixin ay daabacday Middle East Eye ayaa sheegtay in tallaabooyinkii ugu dambeeyay ay ka mid tahay xiriirka sii xoogeysanaya ee Israel la leedahay Republika Srpska, oo ah maamulka ay Serbiyiintu maamulaan ee ka tirsan Bosnia iyo Herzegovina.
Željka Cvijanović, oo ka tirsan madaxtinimada wadajirka ah ee Bosnia, ayaa dhowaan booqasho ku tagtay Israel, halkaas oo ay kula kulantay Ra’iisul Wasaare Benjamin Netanyahu, Wasiirka Arrimaha Dibadda Gideon Saar iyo mas’uuliyiin kale.
Booqashadaasi ayaa dhalisay dood siyaasadeed, kaddib markii sawirro laga baahiyay kulamada ay muujiyeen calanka Republika Srpska, halka aan lagu arag calanka rasmiga ah ee Bosnia. Dowladda Bosnia ayaa arrintaasi ka muujisay walaac, iyadoo u dirtay Israel cabasho diblomaasiyadeed.
Warbixintu waxay sheegtay in Israel ay danaynayso dhisidda xiriirro cusub oo ay la yeelato maamullo iyo dhinacyo raadinaya taageero siyaasadeed iyo diblomaasiyadeed, si ay u ballaariso saaxiibbadeeda caalamiga ah.
Middle East Eye ayaa sidoo kale xustay in Somaliland ay qayb ka tahay meelaha uu Israel xiisaha u muujiyay sannadihii dambe, inkastoo aanay jirin aqoonsi caalami ah oo si rasmi ah loogu diiwaangeliyay xiriir diblomaasiyadeed oo buuxa oo u dhexeeya Israel iyo Somaliland.
Falanqeeyayaal la hadlay warbaahinta ayaa sheegay in Israel ay raadineyso xulafo cusub oo siyaasadeed, gaar ahaan xilli ay sii kordhayaan cadaadisyada iyo dhaleeceynta caalamiga ah ee la xiriira siyaasaddeeda Bariga Dhexe.
Khubarada ayaa sidoo kale tilmaamay in xiriirrada noocan ah ay qayb ka yihiin tartanka saameynta diblomaasiyadeed ee ka socda gobollo kala duwan, iyadoo dhinacyo badan ay doonayaan inay helaan taageero iyo xulafo cusub oo caalami ah.
Dhanka kale, falanqeeyayaal ayaa ka digay in gobollada ay ka jiraan murannada siyaasadeed aan loo adeegsan goob lagu kala riixdo khilaafaadka iyo loollanka quwadaha caalamiga ah, iyagoo ku baaqay in xalalka siyaasadeed lagu raadiyo wada-hadal iyo is-afgarad.
