Madaxweynaha Kenya, William Ruto, ayaa magacaabis cusub ku sameeyay adeegga diblomaasiyadda dalkaas, taas oo saameyn ku leh xiriirka Kenya iyo Soomaaliya, sida lagu shaaciyay qoraal rasmi ah oo kasoo baxay dowladda Kenya.
Qoraalka ayaa lagu sheegay in Elias Bare Shill loo magacaabay Safiir Ku-xigeenka Jamhuuriyadda Kenya u fadhiya Jamhuuriyadda Federaalka Soomaaliya. Elias Bare Shill ayaa ka hoos shaqayn doona Safiirka Kenya ee haatan jooga Muqdisho, Kubai Iringo.
Magacaabistan ayaa qeyb ka ah isbeddello ballaaran oo uu Madaxweyne Ruto ku sameeyay howlaha dibadda, kuwaas oo ay ku jiraan wareejin iyo buuxinta xilal ka bannaan safaaradaha Kenya ee dalal kala duwan. Dhanka kale, Safiir Joseph Warui ayaa loo diray Moscow si uu Kenya uga matalo Ruushka, halka Mohammed Hussein Nur loo magacaabay Safiir Ku-xigeenka Kenya ee Tanzania.
Mas’uuliyiinta Kenya ayaa sheegay in magacaabista Elias Bare Shill ay qeyb ka tahay dadaallada lagu xoojinayo xiriirka diblomaasiyadeed, iskaashiga amni, siyaasadeed iyo dhaqaale ee u dhexeeya Kenya iyo Soomaaliya, xilli labada dal ay wadaagaan dano ku saabsan amniga gobolka iyo la-dagaallanka kooxaha hubeysan.
Dowladda Kenya ayaa sidoo kale xustay in isbeddelladan ay qayb ka yihiin ballaarinta joogitaankeeda diblomaasiyadeed ee caalamka.
Warar xaqiqda ku saleysan oo muhim ah kalasoco WARARKA24
