Jabuuti, 26 Luulyo 2025 – Madaxweynaha Jamhuuriyadda Federaalka Soomaaliya, Mudane Dr. Xasan Sheekh Maxamuud, ayaa maanta gaaray magaalada Jabuuti ee caasimadda dalka walaalaha ah ee Jamhuuriyadda Jabuuti. Socdaalkiisa waxaa lagu sheegay mid muhiim ah oo dhanka diblomaasiyadda, isagoo halkaas kula kulmi doona Madaxweynaha Jabuuti, Mudane Ismaaciil Cumar Geelle.
Labada hoggaamiye ayaa kulankooda xoogga ku saari doona xoojinta xiriirka walaaltinimo ee labada dal ka dhexeeya iyo iskaashiga istaraatiijiga ah ee ku saabsan arrimaha amniga, siyaasadda, dhaqaalaha, iyo sugidda xasilloonida guud ahaan gobolka Geeska Afrika. Kulankan ayaa qeyb ka ah dadaallada joogtada ah ee labada dowladood ugu jiraan in la sii xoojiyo midnimada iyo iskaashiga labada shacab.
Madaxweyne Xasan Sheekh ayaa sidoo kale la filayaa inuu kala hadlo dhiggiisa Jabuuti arrimo la xiriira amniga xuduudaha, la dagaallanka argagixisada, iyo iskaashi ku aaddan horumarka dhaqaalaha iyo ganacsiga.
