Muqdisho (Wararka24) – Hay’adda Socdaalka iyo Jinsiyada Somaliya ayaa manta oo Isniin ah soo bandhigtay naqshada baasaboorka cusub ee dalka, kaas oo markii ugu horreysay ay ku qoran tahay magaca Bulshada Bariga Afrika (EAC).
Hay’adda ayaa sheegtay in baasaboorku uu muujinayo aqoonsiga qaranka iyo sumcadda Somaaliya ee dibadda, isla markaana qoraalka EAC uu yahay calaamad rasmi ah oo tilmamaysa xubinnimada Somaaliya ee ururka.
Baasaboorka cusub ayaa noqon doona sadex nooc oo midabyo kala duwan leh. Baasaboorka caadiga ah oo buluug ah ayaa loogu talagalay muwaadiniinta u safraya dibadda si ay u dalxiisaan, wax u bartaan, ganacsi u galaan ama qoysaskooda u booqdaan.
Baasaboorka shaqada oo cagaar ah ayaa loogu talagalay shaqaalaha dowladda iyo masuuliyiinta u safraya hawlo rasmi ah. Nooca saddexaad waa baasaboorka diblomaasiyada, oo ay qaadan doonaan diblomaasiyiinta iyo saraakiisha sare ee sharcigu u oggol yahay.
Hay’addu ma aysan shaacin xilliga si rasmi ah loo bilaabayo bixinta baasaboorka, qiimaha uu ku fadhiyo iyo muddada uu shaqeynayo.
Agasimaha Hay’adda Socdaalka iyo Jinsiyadda, Xuseen Iidow, ayaa dhawaan sheegay in baasaborka la filayo in la soo saaro dhamaadka sannadkan. Wuxuu xusay in Soomaaliya ay dhamaystirtay qayb weyn oo ka mid ah habraacyada looga baahan yahay, inkastoo ay weli jiraan qaar aan la dhamaystirin.
Bishii Janaayo ee sanadkan, hay’addu waxay ku dhawaaqday in baasaboorka cusub uu yeelan doono nidaam ammaan oo la xoojiyay, uuna buuxin doono heerarka Hay’adda Duulista Rayidka Caalamiga ah (ICAO), si looga hortago been-abuurka loona kordhiyo aqbalaadda uu ka helo xuduudaha.
Hay’adda ayaa sidoo kale sheegtay in baasaboorrada hadda la isticmaalo ay sii shaqeyn doonaan, muwaadiniintana la siin doono tilmaamo ku saabsan sida loogu wareegi doono kan cusub.
Soomaaliya waxay heshiiska ku biirista Bulshada Bariga Afrika saxiixday 15-kii Disembar 2023, waxayna xubin buuxda noqotay 4-tii Maarso 2024, sida uu caddeynayo ururka EAC. Xubinnimada iyo baasaboorka cusub keliya looma qaadan karo oggolaansho guud oo fiiso la’aan ah.
Ilaa hadda lama caddeyn in baasaboorka cusub uu Somaalida u fududeyn doono galitaanka dalalka Bariga Afrika iyadoon fiiso loo baahnayn.
