Wararka24: Madaxweynaha Soomaaliya, Xasan Sheekh Maxamuud, ayaa maanta ka qaybgalay munaasabad heer qaran ah oo lagu xusayay Maalinta Calanka Soomaaliyeed, taas oo sanad kasta la xuso 12-ka Oktoobar, laguna maamuuso taariikhda calanka iyo halgankii gobannimada dalka.
Munaasabadda oo ka dhacday xarunta Madaxtooyada Soomaaliya ee Villa Soomaaliya, ayaa waxaa ka qaybgalay mas’uuliyiin sare oo ka tirsan dowladda federaalka, oo ay ka mid yihiin guddoomiyaha Golaha Shacabka, guddoomiye ku-xigeenka koowaad ee Aqalka Sare, ra’iisul wasaaraha, guddoomiyaha Maxkamadda Sare iyo taliyeyaasha ciidamada qalabka sida.
Cutubyo ka kala socday ciidamada dhulka, cirka iyo badda ee Xoogga Dalka Soomaaliyeed ayaa munaasabadda ku soo bandhigay dhoollatus ciidan. Bandhigga ayaa lagu muujiyey doorka ciidamada ee ilaalinta madax-bannaanida, midnimada iyo amniga dalka.
Xasan Sheekh oo ka hadlay taariikhda calanka
Madaxweynaha ayaa khudbad kooban oo uu munaasabadda ka jeediyey ku muujiyey muhiimadda taariikheed ee 12-ka Oktoobar iyo kaalinta calanka Soomaaliyeed uu ku leeyahay aqoonsiga qaranka, midnimada shacabka iyo xusuusta halgankii xorriyadda.
Xasan Sheekh ayaa sheegay in calanku astaan u yahay himiladii gobannimo-doonka Soomaaliyeed iyo naf-hurnimadii dadkii u soo halgamay madax-bannaanida dalka. Wuxuu sidoo kale xusay in ilaalinta dhaxalkaas ay tahay masuuliyad saaran jiilasha maanta iyo kuwa mustaqbalka.
Madaxweynaha ayaa xusuus iyo maamuus u diray halgamayaashii naftooda u huray xorriyadda iyo difaaca qaranka, isagoo Alle uga baryey inuu naxariistiisa Janno ku abaalmariyo dadkii ku naf-waayey difaaca dalka, diinta, dadka iyo qarannimada Soomaaliyeed.
Baaq ku saabsan midnimada iyo madax-bannaanida
Madaxweynaha ayaa shacabka Soomaaliyeed ugu baaqay inay ilaashadaan dhaxalka dowladnimo ee ay ka tageen halgamayaashii gobannimada, isla markaana ay ka wada shaqeeyaan xoojinta midnimada, ilaalinta madax-bannaanida iyo adkaynta jiritaanka qaranka.
Calanka Soomaaliya ayaa markii ugu horreysay la taagay 12-kii Oktoobar 1954-kii, xilli uu socday halgankii gobannimada iyo isu diyaarinta madax-bannaanida. Taariikhdaas ayaa ka mid ah dhacdooyinka muhiimka u ah aqoonsiga qaranka Soomaaliyeed.
Maalinta Calanka ayaa sanad kasta loo asteeyaa xusuusinta taariikhda calanka buluugga ah iyo xiddigta cad ee dhexdiisa ku taal, kuwaas oo astaan u noqday qarannimada iyo midnimada shacabka Soomaaliyeed.
