Wararka24: Wasaaradda Gaashaandhigga Soomaaliya ayaa faahfaahin hordhac ah ka bixisay dagaalka ka socda magaalada Baydhaba ee xarunta gobolka Bay, kaas oo u dhexeeya ciidamada dowladda Federaalka iyo ciidamo taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen.
Wasaaradda ayaa sheegtay in ciidamada dowladda ay jab xooggan gaarsiiyeen kooxihii weerarka soo qaaday, kuwaas oo ay ku tilmaantay maleeshiyaad Al-Shabaab iyo ciidamo taabacsan Laftagareen oo isku dhinac u dagaallamay. Wasaaraddu waxay sidoo kale baahisay sawirro ay ku sheegtay inay yihiin maydadka qaar ka mid ah xubnihii lagu dilay dagaalka.
Qoraal ka soo baxay Wasaaradda Gaashaandhigga ayaa lagu sheegay in ciidamada dowladda ay si adag uga hortageen weerarka, isla markaana ay gacanta ku hayaan magaalada Baydhaba. Hase yeeshee, faahfaahin madax-bannaan oo xaqiijinaysa khasaaraha iyo xaaladda dhammaan goobaha dagaalku ka dhacay weli lama helin.
Wasiirka Gaashaandhigga Soomaaliya, Axmed Macallin Fiqi, ayaa isna ka hadlay dagaalka, isagoo sheegay in ciidamada dowladda iyo kuwa Birmadka Koonfur Galbeed ay iska caabiyeen weerarkii lagu qaaday magaalada. Waxa uu bogaadiyay ciidamada dowladda iyo kuwa maamulka Koonfur Galbeed.
“Mataanihii argagixisada ee saakay soo weeraray Baydhabo jab xooggan ayaa dhabarka loo saaray,” ayuu yiri Fiqi, sida uu ku sheegay qoraal uu ku baahiyay baraha bulshada.
Dhinaca kale, wararka laga helayo Baydhaba ayaa sheegaya in iska horimaadku uusan weli si buuxda u istaagin. Ciidamo taabacsan Laftagareen ayaa la sheegay inay ka dagaallamayaan agagaarka Masaajida Carabta iyo Jaamaca, oo ku dhow deegaanka Afar Irdoodka ee magaalada.
Dowladda Federaalka ayaa hore Baydhaba u geysay ciidamo dheeraad ah, iyadoo sheegtay inay taageerayaan maamulka uu hoggaamiyo Sheekh Aadan Madoobe. Laftagareen iyo dhinacyada taageersan ayaa dhankooda ku adkeysanaya mowqifkooda siyaasadeed ee ku aaddan maamulka Koonfur Galbeed.
Eedeynta Wasaaradda Gaashaandhigga ee ah in Al-Shabaab ay qayb ka ahayd kooxaha weerarka soo qaaday waxay u baahan tahay xaqiijin madax-bannaan. Ilaa hadda sidoo kale lama hayo xog rasmi ah oo dhammeystiran oo ku saabsan tirada dadka ku dhintay ama ku dhaawacmay dagaalka, iyo khasaaraha soo gaaray shacabka.
